Dis met groot opgewondenheid wat ons jou verwelkom by die vierde Glimlag Fees in Benoni! Hiermee die feesgids waar jy al die moets en moenies van die dag kan nagaan. Die Glimlag Fees is ‘n viering van vreugde, gemeenskap en kreatiwiteit.

Ons is vol dankbaarheid vir die ondersteuning en entoesiasme wat ons elke jaar ontvang. As organiseerders is ons bevoorreg om te getuig hoe die Glimlag Fees gegroei het van ‘n eenvoudige visie tot ‘n geleentheid wat mense – van borge, kunstenaars tot stalletjiehouers – van regoor die land bymekaar bring. Hierdie fees is nie net ‘n geleentheid om te vermaak nie, maar ‘n platform vir verbinding en gemeenskaplikheid.

 Dit is belangrik om te onthou dat die Glimlag Fees nie nét oor feesgangers se GLIMLAG gaan nie, maar dié fees bied ook ‘n geleentheid om terug te gee. Elke glimlag, elke lag en elke dansbeweging dra by tot ‘n groter doel – die ondersteuning van die Smile Foundation en hul belangrike werk om die lewens van kinders – wat nie so bevoorreg is om te kan glimlag nie – te verbeter.